仔女係I人定E人？唔使做測試，從日常觀察理解16型孩子

最近成日聽人講「我係I人」、「我老公成個E人咁」，MBTI 16型人格變成咗新一代嘅社交密碼。搭車又見到後生仔女討論，甚至連自己小朋友嘅學校，都開始用呢套工具引導學生認識自己。你心入面可能都有個疑問：「我個仔咁細，點做測試？」或者「佢咁嘅性格，到底點夾先好？」

其實，唔少家長都發現，用MBTI嚟睇親子關係，與其話係一個科學標準，不如話係一塊鏡，畀我哋睇清楚自己同個仔女究竟「爭啲咩」。我哋唔需要急住幫仔女做嗰啲有成百條問題嘅測試，只要喺日常生活入面，靜靜觀察，知道大家嘅「原廠設定」係點，已經可以減少好多無謂嘅拉鋸，令生活順少少。

「叉電」方法大不同：你個仔女係I（內向）定E（外向）？

第一個最容易觀察嘅，就係佢哋放學返屋企之後嘅狀態。有啲小朋友（通常係E型）會不停地講：「媽咪，我今日小息同邊個玩…」、「老師話…」，佢哋要用把口將成日嘅嘢整理一次，先覺得舒服。佢哋攰嘅時候，反而想出街、想有人陪。

但另一類小朋友（通常係I型）放學返嚟，你問佢十句，佢可能答你一句「是但啦」、「冇咩特別」。佢哋唔係唔開心，而係佢嘅能量已經喺學校用晒，返到屋企需要靜靜地睇本書、砌陣Lego，甚至只係攤喺梳化「回氣」。呢個時候，如果你逼佢「做咩唔出聲？」、「快啲同我傾吓偈」，對佢嚟講唔係關心，而係另一種消耗。

放學後做一件事輕鬆搞掂I型E型仔女

如果屋企有I型仔女，放學頭半個鐘盡量唔好追問佢學校嘅事，準備少少零食，畀佢有一個安靜嘅過渡時間。如果係E型，放學後可以一邊食茶點，一邊聽佢講嘢，滿足佢社交嘅需要，之後佢反而會更願意做功課。

接收資訊嘅天線：你個仔女係S（實感）定N（直覺）

呢個維度，喺教做功課嘅時候最明顯。S型嘅小朋友，鍾意具體、實質嘅嘢。你教佢計數，要一步步嚟，佢會問：「呢步點嚟㗎？」佢哋鍾意跟住說明書砌模型，鍾意清晰嘅指令。相反，N型嘅小朋友，充滿想像力，成日會問：「如果…咁會點？」佢哋砌積木唔會跟說明書，總係要自己創作，作文嘅時候天馬行空，但睇時鐘、計加減數就可能會甩甩漏漏。

S型N型仔女高效學習法

同S型仔女講道理，要用例子，佢做錯咗，直接講出錯嘅地方同點樣改。同N型仔女相處，可以發揮佢哋嘅創意。例如佢唔想溫書，你可以同佢講：「不如我哋玩角色扮演，你嚟做老師，教我呢課書，好唔好？」畀個想像空間佢，佢哋會合作好多。

做決定嘅腦袋：你個仔女係T（思考）定F（情感）？

呢個位，成日誤會到七彩。如果你同仔女講：「你今日做錯事，媽咪好傷心。」F型嘅小朋友，聽到你咁講，會感受到你嘅情緒，可能會即刻喊，或者走嚟攬住你，因為佢哋好在意人與人之間嘅和諧同感受。但如果你遇到T型嘅小朋友，佢可能會好冷靜咁同你分析：「但係媽咪，係因為阿哥搶我嘢我先打佢㗎喎，你傷心係因為覺得我唔啱，但係佢都有錯。」

呢個時候，好多父母會覺得T型仔女「死撐」、「冇感情」、「駁嘴」。其實唔係，佢只係用緊佢個腦袋，去拆解件事嘅邏輯，佢以為你同佢一樣，都係想搵出真相。

對付T型仔女真系用魔法打敗魔法

面對T型仔女，你首先要冷靜，同佢講道理，用邏輯說服佢。例如：「係，佢搶你嘢唔啱，但係你打人，會令件事由『佢唔啱』變成『兩個都唔啱』，呢個策略係咪最好？」佢聽得明。而面對F型仔女，先處理情緒，後處理事情，攬吓佢，等佢冷靜落嚟，先慢慢傾。

生活節奏嘅宇宙：J（判斷）型父母 vs P（感知）型仔女

講到最令人頭痛，一定係呢個組合。好多父母本身係J人，鍾意計劃、鍾意整齊、做完功課先玩。但偏偏，十個細路仔有八個都係P型，佢哋隨性、鍾意探索、唔知「收埋」呢兩個字點寫。放學返嚟，書包亂掉，做功課做做吓又走去玩車，你同佢講星期幾要交功課，佢完全無感。

有次同個家長傾計，佢話：「我同個仔講，你快手做晒啲功課，聽日就可以安心玩㗎嘛！點解佢唔明嘅？」義工阿Sir反問佢：「如果你做晒公司嘢，準備收工，老細突然話『咁得閒，幫我做埋呢份』，你點諗？」個家長即刻明咗。對我哋J人嚟講，「快啲做完」係獎勵；但對P人嚟講，「享受當下」先係王道。

P型仔女係J型父母剋星？

如果屋企有P型仔女，J型父母可能要「讓一步」。唔好將時間表排到密密麻麻，留返少少「甩轆」嘅空間。你可以同佢講：「我哋一陣3點至4點做功課，4點後你想落街玩定係睇卡通片，你自己話事。」畀佢有選擇，有自由嘅空間，佢反而會願意喺約定嘅時間內合作。當然，對P型仔女嚟講，時間觀念要慢慢教，用一個計時器，或者話「呢首歌播完就要收玩具」，有時比鬧鐘更好用。

寫到呢度，其實都只係講咗四個維度嘅基本嘢。每個維度組合埋，先形成16型人格。例如一個I型、S型、F型、P型嘅小朋友，同一個E型、N型、T型、J型嘅父母，衝突一定多，但互補嘅空間亦都大。最重要嘅唔係要將仔女變成另一種人，而係知道佢係咁樣嘅人，我哋可以點樣微調自己嘅把炮，等大家冇咁忟憎。

【關於MBTI 16型人格親子相處的常見問題 FAQ】

我個仔得5歲，點同佢做MBTI測試？啲問題佢邊識答？

咁細個小朋友，真係唔使急住做測試㗎。你當MBTI係一個觀察框架就得。你留意吓佢去公園，係即刻黐埋一堆小朋友玩（E），定係鍾意自己玩沙、睇人玩（I）？佢見到新玩具，係會研究佢點運作（T），定係同佢做朋友、同佢傾計（F）？將你嘅觀察，代入返四個維度，你大概就會捉到佢嘅傾向。

我同C6都係J人，做咩生個仔出嚟可以P到咁？有冇搞錯？

好老實，呢條問題我諗係千古之謎嚟。性格傾向有部份係天性，有部份係受環境影響，無得揀㗎。如果你哋兩個都係咁有規律，個仔完全相反，可能係因為佢喺一個太有規律嘅環境成長，反而想向外探索「亂」嘅可能性？與其問點解，不如諗吓點共存。當你覺得佢亂咁嚟嘅時候，深呼吸，話俾自己聽：「佢唔係想激死我，佢只係個P人。」

我個女（F型）好情緒化，小小事就喊，我想教佢理性啲（T型），有冇辦法？

其實F型嘅人，情感細膩係佢哋嘅天賦，唔係缺點。你如果想佢學識理性分析，唔係喺佢喊緊嘅時候同佢講道理（呢個時候佢聽唔入耳㗎）。而係等佢冷靜之後，你可以同佢一齊還原件事：「你頭先喊，係因為覺得佢唔同你玩，好唔開心？咁如果下次你試吓咁樣同佢講，你話『我好想同你一齊玩』，你覺得得唔得？」先接納情感，再引導思考，咁樣會順暢好多。

成日聽人講S型同N型溝通唔到，係咪真㗎？

又唔係話溝通唔到，只係頻道唔同。好似你去旅行，S型父母會 plan 好行程、book 好酒店、幾點去邊。N型仔女可能會話：「我想慢漫行，發掘吓街角有咩特別嘅小店。」呢個時候，如果大家都堅持，就會有拗撬。可以試吓分工，或者一日行晒預定景點，有一日係自由探索日，滿足大家嘅需要。

我係I型家長，但個仔係超級E人，成日帶朋友返屋企，嘈到拆天，我可以點？

明白嘅，呢個真係一個挑戰。I型父母需要寧靜嘅空間「叉電」，但屋企有個小型社交聚會咁。你可以同個仔約法三章，劃分一個「公共區域」俾佢同朋友玩，而書房或者你間房就係你嘅「叉電區」，呢段時間唔會入嚟騷擾你。或者同佢講明，某段時間可以嘈，但之後嘅「安靜時間」就要細聲啲。

有冇話邊種人格最乖、最易湊？

哈哈，如果有的話，全世界都去拜神求返個啦。冇㗎，每一型都有佢嘅優勢同挑戰。ESTJ可能好有紀律、好可靠，但可能好固執、好難接受新事物。INFP可能好有創意、好善良，但可能成日發夢、唔夠腳踏實地。湊小朋友從來都係「呢樣易搞，嗰樣難搞」嘅交換。

如果我用MBTI去教仔，會唔會標籤咗佢，限制咗佢發展？

你咁諗，就證明你係一個好謹慎嘅父母。MBTI只係一個起點，唔係終點。佢係幫助我哋理解孩子「傾向」點樣諗嘢，但唔代表佢永遠學唔識另一種思考方式。一個P型嘅小朋友，只要你引導得宜，佢都可以學識準時交功課，只不過佢需要用嘅方法同能量，會比一個J型嘅小朋友多。我哋嘅角色，就係理解佢嘅困難，陪佢一齊面對，而唔係逼佢一定要成為另一個人。

給爸媽的溫馨提示

睇完呢篇文，如果你有「嘩，原來我個仔咁嘅性格，都幾有趣」嘅感覺，或者「難怪我哋成日鬧交，原來係咁」，咁就已經係一個好開始。學懂16型人格，唔係要你成為兒童心理學家，而係喺下一次又就嚟嗌交之前，有一刻停一停，諗一諗：「佢咁堅持，會唔會係佢嗰個性格作怪，唔係特登同我作對？」呢一刻嘅諒解，已經可以令生活順咁好多。

最近發現台灣有個MBTI測驗進階版（免費），各位爸媽都可以去測下自己最新格人格：https://types.learntocode.com.tw/

(呢篇文章只係從日常生活觀察同經驗出發，同大家分享MBTI作為親子溝通工具嘅可能性。MBTI測試結果只反映性格傾向，並非能力或心理狀態嘅絕對衡量標準。如果你對孩子嘅行為或情緒發展有持續嘅擔憂，建議尋求學校社工、教育心理學家或相關專業人士嘅意見。）